Artikel

Medienworkshop för junge Lüüd

Wat maakt twölf junge Lüüd an en Wekenend bi Flensborg op´n Scheersbarg in Schleswig-Holsteen? Kloor: Se maakt Radio! Hand in Hand hett dat Lännerzentrum för Nedderdüütsch un de Redakschoon „Heimat, Kultur und Wissenschaft“ vun de NDR 1 Welle Nord in Kiel den Workshop op de Been stellt. An´t End schull en Sendung „Vun Binnenland un Waterkant“ ferdig sien – un dat is glückt!

Toeerst güng dat los mit veel Theorie. Wat is Radio? Wodennig kümmt en Sendung tostannen? Wat will een vun so`n Interviewpartner weten? Frogen över Frogen, de een bi een tosamen mit Redakteur Werner Junge kläärt worden sünd.

Un den güng dat ok al an den Haben. En Deel vun de Grupp hett sik in Maasholm an de Schlie dörchfroogt. Se wullen weten: wat hoolt en echten Seemann vun de DGzRS? Den Fischer weer kloor: op de Seenootredders wüll keen Fischer verzichten un all de anneren, de to See föhrt ok nich.

De Freewilligen vun de DGzRS hebbt ok al töövt un hebbt op de velen Frogen vun de jungen Workshop-Deelnehmers antert. De jüngste Deelnehmerin weer veerteihn Johr oolt un de öllste bummelig dörtig. All sünd se den Oproop vun dat LzN un de NDR 1 Welle Nord folgt. Nawuchs mütt nu mal sien un wer Nawuchs wüll, de mütt mööglichen Nawuchs inladen.

Dat Leven as freewillige Redder bi de DGzRS is nich jümmers Zuckerslicken. Op See kann dat böös to Kehr gahn. Dorvun vertellt de Seelüüd.

En twede Grupp vun den Medienworkshop is na Langaballigau föhrt un weer dor op´n DGzRS-Boot. Un hier datsülvige Speel: vele Frogen vun de Jungen un vele Antwurten vun de Olen. De Deelnehmers vun de Medienworkshop wörrn nich mööd. Dorbi harrn se to´n Deel ´n langen Weg achter sik. Vun Warden an Ruhr bet Kiel un Flensborg – vun Bremerhaben bet Rostock – vun överall sünd se kamen.

Nadem se flietig sneden un Texte schreven hebbt, kunn de Sendung opnahmen warrn. Heel dull opregend weer dat Fernsehteam vun dat Schleswig-Holsteen-Magazin, dat blangenbi dreiht hett. Liekers, de jungen Wekenend-Journalisten bleven „cool“.

Un denn schull noch en Fazit her. Dat weer flink vun Christianne Nölting geven: So en Medienworkshop för junge Lüüd is heel wichtig, wenn wi junge Lüüd för Medien un generell för dat Plattdüütsche interesseren wüllt. De Arbeit weer en groten Freid un dat LzN schickt ´n groten, groten Dank an de Kollegen vun den Norddüütschen Rundfunk!

Mehr dorto:
Radio för junge Lüüd