An’n 3. April weer Annie Heger op’t rode Sofa vun DAS! to Gast. De Singersche, Schauspelersche, Schrieversche un Moderatersche hett dor vun ehr vele Projekten, Optreed, Böker un Films vertellt, de se op Platt un op Hooch maken deit. Passlich to düssen Gast hebbt se in de Sennen ok twee lütte Films inspeelt, de wat mit Platt to doon hebbt.
In den ersten Film geiht dat üm “Plattdüütsch sammeln”. Thorsten Börnsen, de Leider vun’t Lännerzentrum, is dorbinnen op Besöök in Ollenborg un kiekt sik tosamen mit Gabriele Diekmann-Dröge vun de Uni verscheden Steden an, de al op de plattdüütsche Landkort vun “Plattdüütsch sammeln” markeert sünd. To’n Bispeel “de lüttje Schnüsterstuv” in Ollenborg-Bümmerstede, en ümbute Telefonzell, in de en nu na Böker schnüstern kann. Man ok Öörd in Bremen warrt wiest, un in Auerk vertellt Grietje Kammler vun de Oostfreesche Landschop, wo sichtbor Platt ok in Oostfreesland is.
In den tweten inspelten Film vun de Sennen geiht dat üm de Singersche Norma, de in Hamborg ehr erste Live-Album opnahmen hett.
De ganze Folg vun DAS! kann een sik hier noch bet to’n 3. Juli ankieken: https://www.ardmediathek.de/video/Y3JpZDovL25kci5kZS9wcm9wbGFuXzE5NjM1MDkyOF9nYW56ZVNlbmR1bmc
Un den Bidrag över “Plattdüütsch sammeln” gifft dat hier – noch bet to’n 3. Oktober: https://www.ndr.de/fernsehen/sendungen/das/Linguistic-landscapes-Plattdeutsch-im-oeffentlichen-Raum,dasx35864.html