An’n Himmelfohrtsdag weer dat Finale vun’t Dréents Liedties Festival in Emmen in de Provinz Drenthe. De liggt in’n Noordoosten vun de Nedderlannen. De Geschäftsföhrer vun’t Lännerzentrum, Thorsten Börnsen, weer mit vun de Partie as Maat vun de internatschonale Jury. Dat weer en spannende Avend in’t Atlas-Theater. Un för de Jury weer dat toglieks en heel swore Job, denn teihn Bands un enkelte Musiker hebbt speelt üm den eersten Pries vun 2.000 Euro. Un vele vun jüm weren bannig goot. Worrn is dat denn Marianne Veenstra mit ehr Leed “t Is zo wisse (as een klontie zuut is)”.
De Kuntakten na de Nedersaksischen hen, so nöömt sik de plattdüütsche Spraakgrupp in de Nedderlannen, sünd heel wichtig. Denn uns Spraakruum höllt jo nich mit Düütschland op. Över de Grenz weg tosamenarbeiden, nich blots vunwegen de Musik, dat maakt beide Kanten starker.
(Foto: Thorsten Börnsen)