Ansgar Langhorst is bi Radio Bremen Moderator un ok de Plattdüütschbeopdrogte. Wat deit man, wenn so en Mann direktemang ut en Sendung op Besöök kümmt? Klor! Man froogt den Utfroger eerstmal düchtig ut!
LzN:
Wat maakt en Plattdüütsch-Beopodrogten?
Ansgar Langhorst:
En open Ohr hebben för dat Plattdüütsche, allens opschnappen, wat mit Platt to doon hett un Spaaß maakt, kreativ sien un Platt ünner de Lüüd bringen.
LzN:
Wat hest du heel geern maakt?
Ansgar Langhorst:
Mit Freddy Radeke vun „Buten un Binnen“ weer ik op Tour mit en VW-Bus un wi hebbt luter Steden in Bremen un ümto besöcht, wo wi op de Spur vun dat Plattdüütsche weren.
LzN:
Gifft dat ´n Plattdüütschen, den Du geern kennenleren wörrst?
Ansgar Langhorst:
Mit Otto Walkes wörr ik geern mal Oostfresenplatt „praten“. Geern wörr ik mal mit em rümblödeln.
LzN:
Maggst Du so geern blödeln?
Ansgar Langhorst:
Jo! Blödeln kann ik!
LzN:
Stell Di vör, Du sühst en Steernsnupp un Du dörfst Di wat wünschen. De Wunsch erfüllt sik blots, wenn Du den luuthals rutbölken deist! Wat wörrst Du bölken?
Ansgar Langhorst:
De Welt schall gerecht sien!
Wi dankt Ansgar Langhorst, dat he inkeken hett. De Klöönschnack hett heel veel Spaaß maakt un dor is allerhand Kreihenschiet bi rutsuert, de wi noch vörhebbt! Dor freit wi uns düchtig op! Man wat dat is, dat seggt wi noch nich! 😉