Harmut Cyriacks hett – oft tosamen mit Peter Nissen – vele Böker un Theaterstücken schreven un vör allen Dingen: översett. Nu schall dat in Hamborg en Pries in Erinnern an em, de 2022 storven is, geven. Dorför hebbt de Frakschonen vun de SPD, de Grönen, de CDU un de Linke in de Hamborgsche Börgerschop en Andrag stellt. De Pries schall den Insatz un de Leisten vun Cyriacks för dat Plattdüütsche ehren. Mit den Pries, de mit 5000 € doteert ween schall, schüllt tomeist junge Översetters föddert warrn. 2026 schall de Pries to’t erste Mal utgeven warrn, vun dor an all twee Johren.
