(Nadine Koop, Thees Becker un Kevin Behrens bi ehren Vördrag; Foto: Nikos Saul)
An’t drütte Septemberwekenenn weer dat wedder so wiet, un de öllste Literaturdagfohrt in Düütschland – de Nedderdüütsche Dichterdagfohrt in Bämsen (Bad Bevensen) – hett Gäst ut ganz Düütschland un doröver rut in de Lümborger Heid trocken. Düt Maal stünn de Dagfohrt ganz ünner dat Motto „Platt un junge Lüüd“. Dat füng direkt an’n Freedag an, dor weer de Stünn vun de jungen Autoren un Autorschen – en Format, dat dat al fröher geven hett. Gesche Gloystein un Nikos Saul, de ok bi’t Lännerzentrum arbeiden deit, hebbt ehr Texten vör Oort präsenteert, Arne Lentföhr kunn leider nich dorbi ween un harr siene Gedichten inleest. Se wöörn as Videos afspeelt. Mit ehr ünnerschedlichen Texten hebbt de dree wiest, wo wiet dat Feld vun’e junge plattdüütsche Lyrik is. Dorna kunnen all Deelnehmers sülvst lütte Texten schrieven, so nöömte Drabbels, un an Avend hebbt – passlich to`t Thema vun de Dagfohrt – de Jungen Lüüd ut Löwenstedt dat Theaterstück „In de Juni geev dat immer Erdbeeren“ opföhrt. Dat weer en intressante Verbinnen vun Live-Schauspeel un Video to dat Thema Flucht.
De Sünnavend fung an mit de Johrshauptversammeln vun den Vereen „Bevensen-Tagung e. V.“ un en korte Trüchblick op de Geschicht vun de Bämsen-Dagfohrt vun Ingrid Straumer. Dat weer heel intressant wies to warrn, wat för en Rull junge Lüüd in de verleden 75 Johr in Bämsen speelt hebbt. Dorna stünn de Block mit thematsche Vördrääg an. Toerst hebbt junge Lüüd vun den Bunnsraat för Nedderdüütsch un dat Nedderdüütschsekretariat (Thees Becker, Kevin Behrens, Nadine Koop) wat över ehr spraakpolietsche Arbeit vertellt. In ehren Vördrag güng dat üm de Situatschon vun junge Lüüd, de Platt snackt un dormit faken isoleert sünd, man ok üm Föddern an de Politik un üm kunkrete Projekten so as den Opbuu vun en Nettwark vun junge Lüüd, den Kuntakt to Politikers oder ok dat Nedderdüütschforum Ollenborg.
In’n tweten Vördrag vertell Jan Graf vun den Opbuu un dat Enn vun „Plattradio“ in Sleswig-Holsteen, vör allen aver dorvun, op welke Wies de Redaktschon Spraakutboo bedreven hett. Johannes Callsen, de Beopdragte för Minnerheiten in Sleswig-Holsteen, hett dorna vun de polietsche Arbeit för Plattdüütsch in dat nöördlichste Bunnsland Bericht geven un ok seggt, dat dat Lännerzentrum för Nedderdüütsch in Mölln bold wedder besett warrn schall un dat dat en ni’en Anloop för dat Plattradio geven schall.
Mit Literatur güng dat an’n Namiddag wieder. All Lüüd, de Lust dorto harrn, kunnen en Text „op de Kist“ vörlesen. Dor weren ok en paar Drabbels vun’n Vördag dorbi. In’n Ansluss hett dat literarsche Kleverblatt (Carl-Heinz Dirks, Petra Kücklich, Charlotte Paul, Nikos Saul) över Texten för junge Lüüd snackt, un twoors över aktuelle un öllere. De Avendveranstalten an düssen Dag weer en Kunzert vun „Swing op de Deel“, dat musikalsch un textlich op ganze Breet övertügen kunn.
An’n Sünndag güng de Dagfohrt denn to Enn. Imke Schwarz hett den plattdütschen Gottsdeenst holen un dorna wöör de Lüttjepütt-Pries an „De lütten Sülfmeister“ ut Lümborg verlehen. De junge Ledermaker Lennon hett den musikalschen Rahmen baden, un so güng de Dagfohrt passlich to’t Thema „Platt un junge Lüüd“ mit noch mehr Bidrääg vun junge Lüüd to Enn.
(Nikos Saul un Gesche Gloystein; Foto: Thorsten Börnsen)